|
– Dette går over alle støvleskaft og overgår
alt vi hadde våga å tru skulle vere muleg, seier Jermund Rekkedal, ein av
dei tre hovudmennene bak filmen og mannen bak det vesle
produksjonsselskapet Uno. Dei tre vart behørig heidra med blomster og
takk. Men den største gleda og heideren ligg nok i den fantastiske
mottakinga eit stort kinopublikum gav filmen. Fredag vart han vist for
kring 100 inviterte gjester. Søndag var det opa framsyng for alle. Etter
kort tid måtte ein stengje dørene – det var smekk fullt! Ny forestilling
vart sett opp – og ein fylte huset nesten ein gong til.
Inntrykk
Filmen er ikkje overlest med tekniske detaljar. Hovudfokuset er det
tunnelen vil ha å seie for tryggleiken for folk, skip og gods på dette
havstykket. Men også kva det vil ha å seie for miljøet ved at større deler
av transporten går frå land til sjø og på samferdsle og reiseliv generelt.
Veteranar på sjøen som mangeårig MRF-skipper Olger Kobbevik,
hurtigruteveteran Audun Dybedal og redningsskøyeskipper Magne Sætren,
fortalde sine soger på enkel og lettfatteleg, men likevel svært gripande
måte. Alvoret vart tydeleg. ”Dødssvingen på rikveg 1” vart Stadten kalla.
Sluttscena viser gravplassen og kapellet i Ervika medan mannskoret Frendar
syng Himmelske Fader.
Undervegs opplevde ein at det braut ut spontan applus i salen. Då er
kommunikasjonen i orden!
Kommentarane på filmen er lesne av NRK-medarbeidar Janne Brit Aasen frå
Åheim.
Rørte politikarar
Både politikar og pressefolk vi snakka med etter filmframsyninga var
samstemde: Dette var det som skulle til for å overtyde einkvar lunken sjel
om fornufta i prosjektet om Stad skipstunnel.
I går kveld vart filmen vist under dei politiske partia si felles
stormønstring i Måløy. Seinare skal han visast i Bremanger. Onsdag var han
vist på Fylkeshuset i Molde.
Og komande måndag er det framvisning for Arbeidarpartiet i Oslo.
Arbeidarpartiet har vore mellom dei som har vore heller lunkne til
prosjektet, og derfor svært viktige å nå.
Seld til TV?
Jermund Rekkedal fortel at dei har kontakt med både NRK og TV2 med
tanke på eit eventuelt sal av filmen til dei. Dette blir imdlertid ikkje
avklart med det aller fyrste.
|
|
|
