- Eg tek ikkje hardt når vi trur at 500 000 til 600 000 personar vil kome hit for å sjå tunnelen. Det er ei forsiktig utrekning, seier Ståle Olsen i Selje Vekst.

Kampen for Stad skipstunnel er inne i ein kritisk fase. I over 20 år har folk rundt det frykta havområdet kjempa for å få realisert draumen om ein tunnel gjennom Stadlandet - mellom Kjødepollen og Moldefjorden.

Siste frist

Denne veka har selskapet frist på seg til å sende inn siste rest av dokumentasjoen av prosjektet. Og i løpet av året kjem Stortinget truleg til å bestemme seg for om dei vil betale nærare ein milliard kroner for tunnelen.

Olsen trur tunnelen, i tillegg til betra tryggleik for dei sjøfarande, vil bli ein stor turistattraksjon.

- Ser vi på andre naturattraksjonar i Norge som har rundt ein halv million besøkande, så er vi sikre på at vi vil toppe denne lista.

- Ikkje stormannsgalskap

Også Marita Aarvik som arbeider for Vanylven Vekst i nabokommunen nord om fylkesgrensa trur at skipstunnelen vil gje ein halv million turistar årleg. Ho vil ikkje vere med på at det er urealistisk

- Ja, på sikt. Det tek tid å byggje opp ein attraksjon. Men når turistane får Nærøyfjorden, Sognefjellet, Geirangerfjorden og skipstunnelen på same reiseruta, så trur eg ikkje det skal vere problem å få turistar hit. 

- Men dette er dobbelt så mange turistar som besøkjer Briksdalsbreen. Det er ikkje litt stormannsgalskap dette? 

- Nei, det kan eg ikkje sjå. Mange reisemål i Norge har alt i dag det same talet besøkande. 

- Turistane vil velje ytre Nordfjord

Og vekstselskapa i Selje og Vanylven får støtte frå reiselivssjef i Destinasjon Ålesund og Sunnmøre, Wenche Aarset.

- Eg vil ikkje seie noko eksakt tal, men eg trur ein slik tunnel har potensial i seg til å dra fleire hundretusen turistar.

- Er det realistisk å tru at Stad skipstunnel kan verte ein av landets største turistattraksjonar?  

- Eg trur vi sit med ein stor turistattraksjon. Tenk deg ei trolsk stemning gjennom tunnelen. Med rett lyssetting trur eg turistane vil kome for å sjå og oppleve tunnelen. 

Oddgeir Kvernevik på Vestkapphuset delar optimismen. Han trur heile reisemønsteret i regionen vil endre seg frå indre strøk gjennom Stryn og Geiranger til ytre Nordfjord gjennom Selje.

- Tunnelen ingen draum

Det var tydeleg på pressekonferansen onsdag at det er no eller aldri for Stad skipstunnel. Og truleg har optimismen aldri vore sterkare. Aarvik meiner dei no må tore å tru på prosjektet, og ikkje minst planleggje for at tunnelen kjem.

- Dette er ingen draum lenger. No er det mykje som tyder på at det vil gå rette vegen. Eg har enno ikkje høyrt eit godt argument frå verken politikarar eller andre som tyder på at denne tunnelen ikkje skal verte ein realitet.  

- Kva med at vi snakkar om ei stor rekning?  

- Ja, rekninga er stor på desse kantar. Hadde det vore i Oslo hadde ikkje rekninga hatt noko å seie, og tunnelen hadde vore bygt for lenge sidan, seier Aarvik.