Det vert ny utgreiing om Stad skipstunnel. Ein vil mellom anna vurdere alternativ der også hurtigrutene skal kunne gå gjennom holet. (Arkivfoto: Tormod Flatebø)

- Dei utgreiingane som til no er gjennomført har ikkje gitt grunnlag for å gjennomføre prosjektet. Regjeringa ynskjer likevel å «snu kvar stein» i saka, utan å skape nye og urealistiske forventningar. Det seier statssekretær Vidar Ulriksen i Fiskeri- og kystdepartementet i ei pressemelding.

Det prosjektet som til no er utgreidd for Stad skipstunnel er lokalisert der halvøya på Stadlandet er smalast, mellom Kjødepollen og Moldefjorden. Skipstunnelen har hittil blitt planlagt for farty opp til 5.000 bruttotonn. Dei nye utgreiingane vil i tillegg sjå på ei løysning der skip på storleik med hurtigrutefartøyet Midnattssol, som er i overkant 16.000 bruttotonn, vil kunne passere gjennom tunnelen.

Utgreiingane skal klarleggje konsekvensane ved dei ulike tunneldimensjonane, mellom anna kostnadsoverslag, nautiske spørsmål og samfunnsøkonomiske verknader. Det vil også bli gjennomført ei breiare vurdering av prosjektet, så som rammevilkår for turisme og mogelegheiter for sal av steinmasse.
Det vil bli lagt stor vekt på at Kystverket sitt arbeid med nye utgreiingar vert forankra hjå lokale og regionale myndigheiter og interessentar.

I media har det vore framlegg om at ein bør vurdere å leggje den planlagde 420 kV-kraftleidningen i sjøkabel gjennom Stad skipstunnel. På spørsmål frå Fjordabladet om kraftleidningsjøkabel vil bli ein del av vurderingane, svarar avdelingsdirektør Esben Schlytter i departementet at han ikkje kjenner til den saka, men at det er naturleg at dei som har slike innspel tek det opp med kystverket. Førebels er ikkje kartleggingsplanen utarbeidd i detalj.
- Ein ynskjer dialog med lokale interessentar og med fylket. Slike ting som kabel gjennom tunnelen kan bli belyst, men kor vidt ein vil ta dette momentet med i utgreiingane er det for tidleg å uttale seg om enno, seier avdelingsdirektøren.