Men dette betyr slett ikkje at betring av samferdsla i Sogn og Fjordane bør kome langt bak på prioriteringslista – tvert i mot. Dei store og viktige sakene står i kø. Problem knytt til samferdsle som burde ha vore løyst for mange år sidan. Det er sjølvsagt heilt uakseptabelt at ein i eit land som fløymer over av oljepengar ikkje har sikra den svært rasfarlege strekninga langs Kjøsnesfjorden. Den tragiske dødsulykka sit framleis ferskt i minnet. Ei ulykke som burde ha vore unngått.

Dei største utfordringane ligg likevel på nybygging/utbetring av samferdsleårer som er avgjerande for at næringslivet i fylket skal nå opp i ein stadig meir konkurranseutsett kvardag. Fleire prosjekt blinkar seg ut som avgjerande for Nordfjord-regionen, når det gjeld vilkåra for næringslivet. Dei positive ringverknadene av å få realisert Stad Skipstunnel kan ikkje overvurderast. Prosjektet vil gje heilt andre rammevilkår for store delar av kysten på Nordvestlandet. Det vil også vere eit stort pluss for næringslivet om vegen mot Strynefjellet blir rassikra, slik at ein unngår dei stadige stengingane i vinterhalvåret. Flyplass i Nordfjord og Kvivsvegen må også nemnast i denne samanhengen.

Liv Signe Navarsete får utfordringar på rekke og rad frå første dag i statsrådsstolen, noko representanten for det mest distriktsvennlege partiet av dei alle heilt sikkert er fullstendig klar over. Då må ein kunne forvente at dei ovanfor nemnde tiltaka blir høgt prioritert, når dei utan tvil er dei viktigaste faktorane for å bevare og utvikle næringslivet i distriktsfylket Sogn og Fjordane.