Måndag møtte Breivik og representantar frå Kystdirektoratet ti kinesarar i Oslo for å orientere om forprosjektet Stad skipstunnel og den jobben som så langt er gjort.
Breivik fortel at den kinesiske delegasjonen fortalde at dei sjølve har planar om å bygge ein skipstunnel på 2.400 meter. Ein skipstunnel som også få ein sving omtrent på midten.

- Dei verka å vere imponert over det store arbeidet som er lagt ned i forprosjektet. Det dei eigentleg var mest overraska over var at ikkje skipstunnelen er bygd for lenge sidan, seier Breivik.
 
Breivik fortel at dei som møtte frå Kystdirektoratet brukte ein del tid på dei vanskane som hydrologien, eller dragsuget, vil skape i ein skipstunnel.
Dette er problem som er kjende for dei som har jobba med skipstunnelen mellom Moldefjorden og Kjødepollen, men som uansett er svært viktig for å få størst mogeleg nyttegrad av tunnelen.

- Kva ligg i dette?

- At kjølen på båten, eller det som er under vatn av båten, ikkje bør overstige meir enn ein tredjedel av det samla volumet tunnelen har under vatn, fortel Breivik.
 
Som ordførar Gunn R.V. Helgesen i Selje er Breivik oppteken av å få ut informasjon om prosjektet:
- Det vi har opplevd er at dei som set seg inn i kva det er snakk om blir positive til skipstunnelen. Det er dei utan kunnskap om både prosjektet og prosjektet sin store verdi for kysten som er skeptisk, seier Breivik.
I går var Breivik i møte med fylkesordførar Jon Aasen i Møre og Romsdal og ordførar Jan Helgøy i Vanylven for å gå gjennom nytt informasjonsmateriell om Stad skipstunnel.
 
Breivik har ikkje den store trua på at det er avsett pengar til Stad skipstunnel i statsbudsjettet som vert lagt fram 6. oktober. Dermed så reknar han med at skipstunnelen kjem opp som eiga sak i Stortinget. Både regjeringa Bondevik og den sitjande regjeringa har lovd at Stad skipstunnel skal leggjast fram for Stortinget i løpet av 2006.

 

Når det gjeld utfall av Stortinget si handsaming av saka så har Breivik eit håp om at tunnelen no vert sendt ut på anbod, slik at ein kan få eit endeleg svar på kostnaden med prosjektet.

- Det beste hadde sjølvsagt vore at det vart avsett pengar til oppstart. Det nest beste at Stortinget kjem med ei viljeserklæring som seier at tunnelen skal byggjast dersom kostnaden ligg innanfor det som er stipulert. I løpet av vel ei veke så får vi svaret, seier John Breivik.