VÊRHARDT: I perioden 2001 til 2006 vart det registrert om lag 20 meir eller mindre alvorlege hendingar ved Stad kvart år. FOTO: TOR HØVIK

Utskriftsvennlig versjon Tips en venn om denne saken   Tips en venn om denne saken Din e-postadresse:  Mottakers e-postadresse: Din kommentar:

PLANANE OM EIN SKIPSTUNNEL ved Stad er i ferd med å ta form. Bakgrunnen er naturlegvis at havstykket vestafor Stad er det farlegaste havstykket langs norskekysten. Medan resten av kysten kan få melding om stiv eller sterk kuling, er det ikkje uvanleg at vêrvarslinga melder om «storm ved Stad». Då lyt mange fartøy - store eller små - venta til uveret er over. Ein legg ikkje ut på Stadhavet i uver.

Det farlege havstykket gjorde at vikingane tidt drog skipa sine over land ved Stad. Seglande folk tok alt i 1870-åra til å tenkja på ein skipstunnel som kunne gjera overfarten trygg. Men den gongen kosta det meir enn det smakte. På 1980-talet vart tanken lansert på nytt, og seinare har det vore arbeidd seriøst med planar for ein tunnel mellom Moldefjorden i sør og Kjødepollen i nord. Han vil vera 1,7 km lang, og det dyraste alternativet - som vil gje rom for Hurtigruta - har ein førebels kalkyle på drygt 1,7 milliard kroner.

DET ER MYKJE PENGAR. Ekspertane, som reknar på nytte/kost-brøkar, kjem til at nytta er negativ. Men slike reknestykke er som kjent gjort innanfor snevre rammer, og tek ikkje opp i seg alle gunstige ringverknader for lokalsamfunna i området. Ikkje minst kan turismen i Stad-området få ein markert opptur dersom Stadtunnelen blir røyndom.

Likevel er det den store skipstrafikken på Stadhavet som vil få størst nytte og glede av Stadtunnelen. Det opererer rundt 5000 fiskefartøy i området årleg, og det er rekna ut at talet på fritidsbåtar er om lag det same. Totalt passerer det drygt 17.000 båtar forbi Stad kvart år. Med ein tunnel etter det største alternativet vil 85 prosent av alle skip - Hurtigruta inkludert - kunna velja ein trygg passasje gjennom holet i fjellet.

I PERIODEN 2001 TIL 2006 vart det registrert om lag 20 meir eller mindre alvorlege hendingar ved Stad kvart år. Ein skipstunnel vil sterkt redusera faren for ulykker. Dystre spådommar om meir ekstremver - som følgje av klimatiske endringar - er eit sjølvstendig argument som styrkjer tunnelplanane.

Like viktig er auka regularitet. I dag er det svært ofte at skip og mindre båtar må leggja seg på vent fordi vêret er for dårleg - og overfarten for risikabel. Dette råkar Hurtigruta, og det råkar båtar som fraktar fersk fisk.

STADHAVET har også i alle år vore eit hinder for planar om eit snøggbåtsamband mellom Bergen og Trondheim. Mange trur eit slikt samband har ei rik framtid. Men eit slikt snøggsamband til sjøs kan ikkje realiserast utan skipstunnel.

Saka ligg no hos Fiskeridepartementet, og skipstunnelen ligg inne i Nasjonal Transportplan for 2006-2015. Vi synest fiskeriministeren skal fremja ei stortingsmelding som seier ja til skipstunnel frå Moldefjorden til Kjødepollen.